港燦式茶餐廳 野味雜談
作者 : 引刀一快2020年1月30日
瀏覽人次 : 16785    回應 : 21
港燦式茶餐廳 野味雜談
 
引刀一快
2020年1月30日
香港今日被疫情嘅恐怖氣氛籠罩,據說瘟疫來自野味,雖然我個人睇法有異,不過暫時無心在此討論,反而,大多數人所相信嘅野味問題,我興趣大啲,一則農務系出身,二則,集為食、吃貨、饞貓、饕餮、餓鬼於一身嘅引刀,聽到一切同食有關嘅詞彙,都會有生理反應,就係食指大動。

其實,人追捧野味,味道只係其中一環,好多人食野味係出於籠絡交際、炫耀同食療。
講到味道,無可否認部分野味的確係好食,不過亦好講大廚水平同經驗,唔識煮就唔會比家畜家禽好幾多。
廿幾年前,我去粵北實習,住保護站,當時居然有山佬攞野味去保護站賣,十一蚊斤竹鼠。竹鼠又叫芒鼠,有兩種,一種係中華竹鼠,另一種係銀星竹鼠,一種幼毛一種粗毛,有個老教授喺美國返嚟,佢係比曾憲梓高一屆嘅師兄,嗱嗱林買嗮兩隻加餸,咁啱就係一樣一隻。煮咗出嚟,個廚明顯唔得,炆成個幾鐘都好似食橡筋咁,一咬就攝嗮牙罅,保護站有個研究員,居然煮熟咗嘅竹鼠都分得出,揀嗮啲銀星竹鼠俾老教授食,話淋啲喎。
當年食竹鼠係冇罪疚感嘅,因為野外數量好多,冇滅絕危機,而且宰殺手法利索,比好多地方劏豬快手得多。今日,有野生竹鼠都會俾人攞嚟做種繁殖,食就太浪費。
   後來,我又陪老師去過一個海島住,呢個島真係乜都有,有日同保護站嘅人一齊去島另一端,路上見到一條兩三斤左右嘅飯鏟頭,馬上手到拿來,佢地話中午煲湯。
點知到咗中午,個員工話一條蛇唔夠甜,行出去幾分鐘,又揸住一條兩三斤嘅飯鏟頭返嚟,跟著話,加隻雞就夠嘞。雖然煲湯都講師傅,不過今次材料好王道,想衰都難,當係實習加菜。
當年食飯鏟頭,又係冇罪疚感嘅,因為野外資源非常豐富,去到危害島民安全嘅地步,佢地話唔捉唔食都要打,因為太多,呢句話,令人懷念。
記得十幾歲嘅時候,曾經做過獵人,自己去打“野味”食,當年我同個同學仔,帶個野營用gas爐,一人揸一支氣槍,一支eveready電筒仔。我仲記得,我果支係marui嘅MPL,佢果支係俗稱短9000嘅Automag,兩個人坐最後一班船入梅窩,然後沿小路行去瀑布,沿途見到田雞青蛙,一槍一隻,我記得大嘅有田雞、貢德氏蛙、綠瀑蛙、澤蛙,其他太細或者有毒嘅唔打,一路打到小瀑布,就喺果度洗米劏田雞,然後煲田雞飯,煲出嚟非常鮮甜,因為田雞多過飯。
以今日角度睇返,筆者呢個少年回憶認真要不得,殘害野生動物,非指定地點生火煮食,做埋啲咁嘢係咪冇飯食呀?
非也,兩條傻仔食田雞,係因為當年梅窩田雞青蛙多得很,路上見到俾車轆扁俾人踩死嘅青蛙多不勝數,當時心裡面覺得係一種糟蹋,橫掂都係俾車轆,不如下次嚟食一啲,唔好嘥嘛,動機居然係想善用自然資源。
    地球人口已經超過70億,自然環境與人類發展嘅平衡點逐步推移,今日,可以講所有野生動物都係寶貴嘅,因為人類活動,已經嚴重影響自然生態,野生動物再不能作為消費性資源,我地可以做嘅就係保育、觀賞、引種繁殖。當大量物種消失或瀕危,作為食物鏈頂層嘅人類,生活質量亦會不可逆地逐步降低。
1. 打工仔 Andy 2020-01-30 11:12
網上見到唔知乜鼠,似鼠BB條友一隻隻放入口 !
2. 引刀一快 2020-01-30 13:54
打工仔兄

未出毛未開眼老鼠仔,係有藥用價值,生吞可以醫風濕同內傷,用熟石灰醃,陰乾磨粉,係金瘡藥。
至於兄台睇到嘅視頻,九成係因為以訛傳訛拍嘅所謂三吱,好多年前,大陸全國都嘲笑廣東人咩都食,謠傳廣東有道菜叫做三吱,就係生食老鼠仔,筷子夾吱一聲,點豉油又吱一聲,放入口咬又吱一聲,依家抖音流行,就有人真係提供呢啲嘢,其實係三人成虎積非成是,傳統只係生吞,唔會咬。
3. 無奈 2020-01-30 23:22
文章所述似曾相識,塵封了的記憶。

刀兄由野味王變環保行者,華麗轉身,👍。


4. 無奈 2020-01-30 23:24
聽講武漢肺炎可在動物間傳播,刀兄點睇?
5. 引刀一快 2020-01-31 04:56
無奈兄

喺動物之間傳播係必然,不過暫時同貓狗無關,南無阿彌陀佛,千祁咪害埋啲貓仔狗仔。
6. 龍虎豹 2020-01-31 11:25
#2正解

小弟七歲時住板橺房,老豆在床下底發現一窩未開眼老鼠,還被母鼠咬了一啖。

當日佢用三蒸酒浸洗老鼠仔生吞,鄰居圍住看熱鬧,老豆笑問我敢唔敢吞,我係個乜都好奇嘅細路,於是老豆吞一隻我又吞一隻,記憶中吞了五或七隻,後面班女孩睇住叫到呱呱聲。
7. 大鄉里 2020-01-31 22:26
細時長輩在南北行?買了一隻天鵝,生勾勾,殺後在身內挑出幾十粒鐵砂。
唔記得點煮,只係人人都差D咬甩牙,柴皮咁。
乜味冇記憶,不過總算吃過天鵝肉。
8. 引刀一快 2020-01-31 23:30
龍虎豹兄

你都算大膽,我只係夠膽玩,當時大人當寶,就算唔生吞,都攞嚟浸酒,前兩年係元朗見到個阿叔,用個紙盒裝住一堆老鼠仔喺街度賣,浸酒對腰骨好好,可能對於腰椎勞損有功效。
9. 引刀一快 2020-01-31 23:35
大鄉里兄

我細個果時,老竇都買過隻天鵝,分分鐘都係南北行買,因為我老竇係藥材佬,以前成日去上環。
你食咗已經算好,我老竇搞唔掂,俾咗個街坊,據我所知之後再轉咗一手,我唔記得係咩原因,總之惡搞。後來,銅鑼灣糖街果間國貨公司,都有天鵝賣。
10. 龍虎豹 2020-02-01 01:02
引刀兄:

老鼠仔酒在第二年老豆倒咗大半杯出來飲,佢見我又好奇睇住,又大我敢唔敢飲,我二話不說一啖飲晒,五分鐘分酒精上腦要瞓,第一次飲醉酒但奇怪冇嘔,大個咗飲一杯啤酒都唔惦,飲兩杯一定嘔。
11. 大鄉里 2020-02-01 01:22
引刀兄,
都係你爸精D,天鵝肉不吃也罷。
其實想深一層,如果好吃,廣東佬又怎會不打鑼咁到處刮,兼奔走相告呢?
12. 引刀一快 2020-02-01 08:30
龍虎豹兄

如果撈啲浸酒老鼠仔出嚟,你仲敢唔敢食?
飲酒要練,越練越得,同埋最緊要先墊底,食咗嘢先飲,前年我喺一個畢業紀念聚會,有個同學撩我飲,我一啖吹一支紅酒,若無其事,其實,去之前我喺茶仔食咗一大碟炒飯同西多士,肚裡面,只不過係葡萄汁撈飯啫。
13. 引刀一快 2020-02-01 08:47
大鄉里兄

天鵝嘅價值,未必係食味,因為天鵝係雁族,中東人,養隼、有錢嘅會養金雕,目的就係捉大雁,而捉大雁嘅目的,係壯陽😏😏😏
14. 龍虎豹 2020-02-03 11:23
引刀兄:

莫說浸過酒的,今天有新鮮生猛老鼠仔我都唔敢試了。

話說有舊同事住山區木屋,佢捉到老鼠就用來引鷹捉鷹食,佢話鷹唔好食只用來煲湯,而且鷹身上好多蚤的。
15. 引刀一快 2020-02-03 15:10
龍虎豹兄

香港係世界上黑鳶密度最高嘅地方,我估你朋友捉嘅多數係黑鳶,不過鷹呢類嘢最好咪掂,聞說好邪。
有個朋友,好多年前喺樹上見到一對鷹,佢用氣槍打咗隻乸落嚟,隻公衝落嚟救佢,結果俾佢地一班人打死埋,跟著攞嚟煲湯,朋友回憶返,當晚有份飲湯嘅人,後來每一個都坐過監,包括我朋友。
16. 坐過監 2020-02-03 15:22
唔係人生更精彩咩?
17. 引刀一快 2020-02-04 04:41
坐過監兄

呢啲精彩,可免則免。
18. 儒來 2020-02-04 06:17
引刀兄,

祝新春大吉,萬事如意。

引刀兄能引吃鷹事而勸世,足證兄菩薩心腸。
也引證小弟一貫看法,人生到每一個年齡階段,待人處事跟年輕時必定不同,至於野味之道,有一部分人怎樣勸也無動於衷,只能指望當權者能否順應大部分人的意願去立法制止。
19. 引刀一快 2020-02-04 08:28
儒來兄

依家大大對保護野生動物好着力,注重程度前所未有,長江依家全面禁漁,部分江段為十年,部分永久禁漁,我識得一個浙江群友,半夜去撈幾隻蝦,居然有漁監人員出嚟,將佢啲蝦倒返落江,而唔係罰款,呢種關注度,我好驚訝。
20. 儒來 2020-02-04 09:35
引刀兄,

兄不單熟悉珠三角,更足跡遍及長三角,聽兄分析下社會時弊,扼要地講下天南地北,國人風土習慣,實賞心樂事。
小弟想起,電台有2,3個主持之見識跟兄差不多,岑逸飛,劉天賜。
我要回應
我的稱呼
回應 / 意見
驗証文字
 
回應 / 留言規則
  1. 禁止撰寫粗言穢語、誹謗、渲染色情暴力或人身攻擊的言論;
  2. 禁止以名稱/暱稱/綽號/同音字等批評或映射任何人士、機構、公司;
  3. 禁止發佈有關招聘、推銷、廣告等內容;
  4. 禁止公開任何個人資料(如電話號碼、電郵地址、即時通訊帳號等)。

敬請留言者自律。本網站保留刪除/堵截任何留言的權利。

聲 明

所有議題/文章由其作者提供,大部份回應/留言是即時上載,少部份未註冊為會員的回應/留言會經我們的系統過濾,所有議題/文章/回應/ 留言/資訊及評論並不代表地產資訊網(Property.hk)立場和觀點。由於本【地產論壇】受到「即時上載留言」運作方式所規限,故不能完全監察 所有留言,若讀者及用戶發現有留言出現問題,歡迎以留言或電郵方式與我們聯絡(admin@property.hk),我們有權刪除/堵截任何留言 (刪除/堵截留言前不會作事先警告及通知), 如有任何爭議,本網站管理員擁有最終的詮釋權 。