大家好!上回讲到引刀撞彩夹符碌有高校肯收,引刀梗系去马喇,呢度先开个小岔,引刀好迷信,点解呢,系因爲好多经历令引刀有迷信嘅联想,入学果年,屋企棵铁树开花,第二年就万年青开花,呵呵,系咪好跷呢?唔讲呢D住,入番正题先。
一入学,当时我系全宿舍第一个人到步,交咗当年杂费,就去领草席、棉被、水桶、热水壶,(充满民工feel)第一件事就系入宿舍霸位,好好彩咁拣咗阳台边嘅上格床,点知拣好个靓位之后,个人行出去一阵,热水壶就俾其它房嘅人换咗个爆胆嘅,之后,我下铺嘅同学,帮我刻个名喺壶上面,佢话咁咪唔怕再俾人换 罗,我攞住个冇得换番嘅爆胆壶,好感激佢............
呢件事,展现咗港人同大陆人之间,某些观念上嘅鸿沟,一般嚟讲,香港人边有咁衰换走人地件嘢嘅吖,但系,又有几多香港人咁亲切咁神心帮个初相识刻名呢?喺大陆时间长嘅人,都会深有体会。
一开学冇耐就开始军训,引刀学识咗一样重要嘅谋生技能,唔系步操,唔系格斗,更唔系射击,系俾面!排长生日,大家要我企岀嚟用纯正香港腔调清唱 Beyond同佢祝寿,大佬,唱得掂就去American idol都得喇,结果我夹硬唱咗罗文嘅前程锦綉,点知开腔一唱,先至从各人迷惘嘅眼光中发现,原来个个都未听过呢首嘢,即时尴尬到面瘫,好在有好多人夹硬拍手掌,令我充分体验咗“俾面”嘅可贵。
正式学期开始,问题亦开始,普通话!大家唔好以爲净系引 刀一个听课有问题,原来唔少老 一辈嘅老师系唔识普通话嘅,讲得仲衰过香港D官员,大家亦唔好以爲净系广东人普通话差,原来其它省份上年纪嘅人一样有部份讲得嘛嘛,好几个课我好开心咁睇见一班同学陪我R头,世事无绝对呀!
当年大陆嘅高校生活,条件完全同香港嘅生活无法比拟,如果今日仍然保持在当时的状态,恐怕大量年青人会打退堂鼓,晚上11点开始停电、公用厠所、无门男浴室、民工级别饭堂等等,等等,正是如此,让引刀感到自豪,因爲我能屈能伸。
讲到呢度,仿佛见到无数怒目而视嘅眼睛,喂,引刀口水佬,想呃饭食呃到几时呀?楼呢!稍安毋躁,稍安毋躁,有足够嘅铺垫,慢慢就会入正题:大陆屋有乜好?